Бүгүн, 15-марта Россияда президенттик шайлоого добуш берүү башталды. РИА Новости маалымдагандай, ал үч күнгө созулуп, негизги добуш берүү күнү 17-мартта болот. Россиянын президенттигине төрт талапкер аттанган: Владимир Путин, Леонид Слуцкий, Николай Харитонов жана Владислав Даванков.
Шайлоочулар жана участкалар
Өлкө боюнча шайлоо участкалары салттуу түрдө добуш берүүнүн биринчи күнү, 15-мартта жергиликтүү убакыт боюнча саат 8:00дө ачылып, 20:00гө чейин ачык болот. Бирок Камчатка менен Чукоткада 14-мартта Москва убактысы боюнча саат 23.00дө, ал эми Москва убактысы боюнча так түн жарымында Сахалин жана Магадан облустарында шайлоо тилкелери ачылды.
Добуш берүү күндөрү Россия боюнча 94 миңден ашуун шайлоо участкалары эшигин ачат.
Россия Федерациясынын Борбордук шайлоо комиссиясынын маалыматы боюнча, 2024-жылдын 1-январына карата Россияда шайлоочулардын саны 112 миллион 309 миң 947 адамды түздү. Өлкөнүн чегинен тышкары (РФ Тышкы иштер министрлигинин маалыматы боюнча) шайлоо укугу бар жарандардын саны 1 890 863 адамды, Байконур шаарында 11 924 адамды түздү.
Чет өлкөдө жашаган же жүргөн россиялыктардын президенттик шайлоодо добуш берүүсү үчүн 144 өлкөдө 295 шайлоо участогу түзүлгөн.
Мындан тышкары, Россияда шайлоо баштала электе эле ошондой эле чет өлкөлөрдө президенттик шайлоо үчүн мөөнөтүнөн мурда добуш берүү өткөрүлгөн. Алыскы жана жетүүгө кыйын аймактарда, ошондой эле добуш берүү күндөрү суу үстүндө боло турган кемелерде добуш берүү 25-февралда башталып, 14-мартта аяктады.
Борбордук шайлоо комиссиясынын бейшемби күнү түштөн кийин жарыяланган маалыматы боюнча, мөөнөтүнөн мурда 2 миллион 300 миңден ашуун шайлоочу добуш берген. Добуш берүү бардыгы болуп Россия Федерациясынын 42 субъектисинде, анын ичинде жаңы аймактарда өттү.
1-марттан тарта чет элдик шайлоо участкаларында мөөнөтүнөн мурда добуш берүү башталган. Ал 45 өлкөдө 67 шайлоо участкасында өттү.
Байкоочулар жана журналисттер
Быйыл эл аралык курч кырдаалдан улам Европадагы коопсуздук жана кызматташык уюмунун (ЕККУ) Демократиялык институттар жана адам укуктары боюнча бюросунун байкоочулары Россиядагы президенттик шайлоого байкоо жүргүзүүгө катышпайт. Бирок шайлоо эл аралык көзөмөлсүз калбайт. Шайлоодо КМШ жана ШКУнун байкоочулар миссиясы иштейт. Ошондой эле БШКнын маалыматы боюнча, президенттик шайлоодо 106 өлкөнүн өкүлдөрү эл аралык байкоочу катары аккредитация алышкан.
Мындан тышкары, Россия Федерациясынын президентин шайлоодо добуш берүүнүн жүрүшүнө жана анын жыйынтыгын чыгарууга коомдук көзөмөл россиялык байкоочулар тарабынан ишке ашырылат.
Шайлоону дээрлик 13 миң журналист чагылдырат. Добуш берүүнүн купуялуулугу бузулбаган шартта видеого жана сүрөткө тартууга, жада калса шайлоочулар каршы болбосо үйдө добуш берүүгө катышууга укугу бар. Россия Борбордук шайлоо комиссиясынын 14-18-март аралыгында иштей турган маалымат борборунда добуш берүүнүн жүрүшүнө дээрлик 1,5 миң журналист көз салат. 90 ЖМКнын өкүлдөрү аккредитациядан өтсө, анын 40ы чет элдик.
Кыргызстанда 17-мартта Россиянын президентин шайлоо үчүн төрт участок ачыларын буга чейин Россиянын Кыргызстандагы элчиси маалымдаган.
Шайлоо участкалары жергиликтүү убакыт боюнча саат 8.00дөн 20.00гө чейин иштейт. Бишкекте – Россиянын элчилигинде (Манас проспекти, 55), Ош шаарында – Башкы консулдукта (Бобулов көчөсү, 77), Кантта – №20022 аскер бөлүгүнүн маданият үйүндө (Полевая көчөсү, 10А/1) жана Каракол шаарында – №87366 аскер бөлүгүнүн клубунда (Кой-Сары).
